Bəzi insanlar tərk edilməkdən və tək qalmaqdan qorxurlar. Və çox maraqlıdır ki, bu tip insanlar adətən tərk edilir və tək qalırlar. Bu yaxınlarda bir pasiyentim hər zaman tərk edilməkdən qorxduğunu dedi. Çünki, uşaq vaxtı valideynləri ayrılmış və o, özünü tərk edilmiş kimi hiss etmişdi. Hal-hazırda da həyatında heç kim yoxdur və özünü dəyərsiz hiss edir. Ondan daha əvvəlki münasibətləri ilə bağlı soruşanda mənə 3 münasibəti haqqında danışdı və hər üçündə də qarşı tərəf onu tərk etmişdi.
Çünki, bu tip insanlar yaxınlarını yanlarında saxlamaq üçün hər şey edirlər və bu çox bezdirici olur. Pasiyentim də tez-tez münasibətdə olduğu adamlara zənglər edir və tələb edirdi ki, onunla daha çox vaxt keçirsin. Hətta bir dəfə sadəcə sevgilisinin səsini eşitmək üçün gecə saat 3-də zəng edib, yuxudan oyatmışdı. Münasibətdə olduğu adam tez-tez xarici ölkələrdə təşkil olunan konqreslərə və konfranslara gedirdi. Pasiyentim danışır ki, belə hallarda özünü xüsusilə narahat hiss edir və bunu ona yaşatdığı üçün sevgilisinə hirslənirdi. Nəticədə, görüşəndə də dalaşmağa başlayırdılar. Ya da, münasibətdə olduğu insanlarının ondan ayrı bir məşğuliyyətlərinin olması onun üçün fəlakət idi. Onun dediyi sözləri kimsə unudanda və ya eşitməyəndə özünü dəyərsiz hiss edirdi. Bu cür hallar qarşı tərəfi o qədər çox yorurdu ki, nəticədə pasiyentimdən ayrılmağı seçirdilər.
Bütün bunlar tərk edilmə qorxusunun təsiri ilə baş verir. Amma, belə bir kompleksiniz varsa, bunu qırmaq lazımdır. Unutmayın ki, münasibətdə olduğunuz insanların sizdən ayrı da bir həyatı ola bilər. Hobbiləri, məşğuliyyətləri, işləri və s. ola bilər. Günün stressi arasında nələrisə unudar, ya da dediyiniz eşitməyə bilər. Bunlar normal və insanlıq halıdır. Buna görə problem çıxarmaq, ya da özünüzü dəyərsiz hiss etməyə ehtiyac yoxdur. O, sizin yanınızdadır. Onun qarşısında tələblər qoyub, problem çıxarmaq yerinə daha pozitiv olsanız nəticə daha gözəl olmaz? Unutmayın ki, “o məni tərk edəcək” kəhanəti özü-özünü doğrulayır. Belə düşündüyünüzdə elə şeylər edirsiniz ki, o sizi həqiqətən də tərk edir.
Fuad Əsədov
