Bir müddət əvvəl instaqram hesabımdan belə bir sorğu keçirmişdim. “Psixoloji narahatlıqlarınızın olmasına rəğmən psixoloqa müraciət etmədiyiniz olurmu? Olursa, niyə?”
Bu sorğuya təxminən 200 nəfər qatıldı və ən çox verilən üç cavab bunlar idi.
- Maddi imkanım yetərincə yüksək deyil.
- Psixoterapiyanın nəyisə dəyişdirəcəyinə inanmıram.
- Problemlərimlə üzləşməkdən qorxuram.
İndi Jeffrey Youngun pasiyentlərin psixoterapiyaya gəlməsinə əngəl olan faktorlarla bağlı fikirlərini oxuyurdum, dedim mən də bu haqda yazım.
Hər üç punkt haqqında qısaca fikir bildirmək istəyirəm. Baxın, psixoterapiya sizin düşüncələrinizi, ya da şemalarınızı dəyişdirərək həyatınızı və münasibətlərinizi daha yaxşı hala gətirir. Bu, avtomatik olaraq sizin xoşbəxtlik dərəcənizi də artırır. Və məncə bunun müqabilində xərclənəcək pul daha az dəyərlidir. Çünki, əslində maddiyyat da bizə xoşbəxtliyimizi təmin etmək üçün lazımdır. Amma, bu gün bir çox insan cibində pulu olsun deyə, xoşbəxtliyini qurban verir. Bu təkcə, psixoterapiyaya müraciət etməməklə bağlı deyil. Məsələn, bir müddət əvvəl milyoner bir pasiyentim var idi. Pasiyentimin şirkətləri, yaxtası və villaları var idi. Seansda belə bir cümlə işlətdi.
- Özümə vaxt ayıra bilmirəm. Çünki, işlərin başında özüm olmasam, daha az pul qazanaram.
Bəli, bu adam daha çox pulu olsun deyə, xoşbəxtliyini və həyatını qurban verirdi.
Psixoterapiyaya güvənmək məsələsinə gəlincə, psixoterapiyanın depressiya, həyəcan-təşviş, əsəb kontrolu, konfliktli münasibətlər, obsessiv kompulsiv pozuntu, özgüvən əksikliyi, mükəmməlliyətçilik və s. kimi problemləri həll etdiyi dəfələrlə elmi olaraq sübut olunub. Və Azərbaycanda da bu işlə peşəkar səviyyədə məşğul olan psixoloqlar var.
Gələk, problemlə üzləşməkdən qorxmaq məsələsinə. Bəli, psixoterapiya bəzən sizi çətinə sala bilər. Siz ağlaya bilərsiniz, ya da texnikaları tətbiq edərkən çətinlik çəkə bilərsiniz. Amma day indi neyniyək. Xoşbəxtlik dəyişməkdən keçir. Dəyişmək isə bəzən çətin ola bilər. Amma, ən çətin qismi də elə başlamaqdır.
Fuad Əsədov
