Son zamanlarda diqqətimi ən çox çəkən proses gənclərin harasa tələsməyidi. Amma bu, məkanda tələsmə deyil, zamanda tələsməkdi. Gəncləri bir düşüncə əhatə edib.
Vaxt gedir və mən hələ heç nə etməmişəm.
Mən buna MAO sindromu deyirəm. Yəni, Məndən Adam Olmayacaq. Gənclər, davamlı olaraq daha çox uğur əldə etməyin dərdindədirlər. Amma məncə, uğur əldə etmək təkcə çox çalışmaqla bağlı deyil, həm də yaxşı əylənə bilməklə bağlıdır. Dünən bir pasiyentim deyir ki, əyləndiyim hər dəqiqə vicdan əzabı çəkirəm ki, vaxtımı daha səmərəli keçirə bilərdim. Baxın, bu, dediyim MAO sindromudur. “Əylənirəm, deməli məndən adam olmayacaq”.
Halbuki, əyləncə bu qədər ucuz bir şey deyil. Biz əylənən zaman beynimizdə endorfin, serotonin və dopamin ifraz olunur. Bunlar immuniteti gücləndirir, daxili orqanların işini yaxşılaşdırır, maddələr mübadiləsini sürətləndirir, diqqəti, yaddaşı inkişaf etdirir, nələr olur, nələr.
Əylənin gənclər. Gənclik zamanı yaxşı və produktiv bir şəkildə dəyərləndirmək dövrü olduğu qədər, həm də əylənmək dövrüdür. Bir azdan əylənmə şanslarınız daha az ola bilər. Gəncliyin qədrini bilin. Sadəcə, kifayət qədər əylənən insanların məmnunluq səviyyəsi yuxarı ola bilər. Və sadəcə məmnun insanlar uğur qazana bilir.
Siz qarışqa deyilsiniz, insansınız.
Fuad Əsədov
