Çoxdandır, zamanı idarə etməklə bağlı yazı yazmaq istəyirəm. Çünki, mənə ən çox verilən suallardan biri də budur ki, bu qədər işi necə çatdırırsan?
Ümumiyyətlə, zamanı idarə etmək bacarığı hədəfləri olan hər bir insanın özündə formalaşdırmalı olduğu bir qabiliyyətdir. Zamanı idarə edə bilmək işin keyfiyyətini artırmaqla yanaşı, həm də insanın stress səviyyəsini azaldır. Gündəlik işləri planlamaq və hətta bunu yazılı şəkildə etmək insanın beynində konkret fikir formalaşdırır. Bu gün hansı işi saat neçədə görəcəm? Bu cür konkret fikir insanın narahatlığını azaldır, onun motivasiyasını və işin keyfiyyətini isə artırır. Bundan əlavə, işləri planlayan zaman insan geriyə nə qədər boş vaxtının qaldığını görür. Həmin o boş vaxtı isə hobbilərinə və əyləncəsinə sərf edə bilər. Yeri gəlmişkən, adətən insanın boş vaxtı o düşündüyündən daha çox olur. İctimai nəqliyyatı gözləmək, bir növbədə durmaq, avtobusla səyahət etmək kimi fəaliyyətlər əslində bizə az da olsa dəyərləndirə biləcəyimiz vaxt təmin edir. Bəzən insan ümumiyyətlə heç bir şey etmədən internetdə gəzir, tv kanallarını çevirir ya da sadəcə boş oturur. Zaman idarə etməklə bağlı plan qurduqda isə bu cür vaxt sərfiyyatının qarşısı alınır. İnsan hər anı effektli keçirməyə başlayır. Çünki, əyləncə saatları və iş saatları arasındakı ayrımı etmək önəmlidir. Həmçinin, konkret olaraq insan nə etməli olduğunu biləndə, hədəfinə doğru daha sürətlə addımlamağa başlayır. Zamanı idarə etmək üçün proqram quran zaman yaxşı olar ki, işlər aşağıdakı kateqoriyalara bölünsün.
-Önəmli və təcili
- Önəmli, amma təcili olmayan
- Önəmli deyil, amma təcilidir
- Önəmli də deyil, təcili də deyil
İşləri bu şəkildə kateqoriyalara bölmək insanın beynini əlavə fikir parazitlərindən azad edir. Nəticədə, o nə etməli olduğunu yaxşı bilir.
P. S. 3C Business calendar proqramını istifadə etməyi tövsiyə edirəm
Fuad Əsədov
