Bir insanın bacarmalı olduğu ən önəmli şeylərdən biri vəzifəcə özündən aşağı insanlarla normal danışmaqdır. Bir insanın sosial mövqeyi nə olursa olsun, insan kimi rəftara layiqdir. Hər kəs bərabər hüquqludu və hər kəs insandır. Özündən vəzifəcə böyük insanlara ya da ən azından özü ilə bərabər vəzifəli insanlara yaxşı davranmaq mədəniyyət deyil. Bu ən yüngül formada desək, məcburiyyətdir.
Önəmli olan isə ofisiant, sürücü, satıcı, usta kimi insanlarla nəzakətlə danışmaqdır. Bu insanların təhsil ya da maddiyyat cəhətdən bizdən aşağı olması, insan olaraq da bizdən dəyərsiz olduqları mənasına gəlmir. Onlar da insandılar və hisləri var. Təkrar edirəm, hisləri var. Və heç kimin qəlbini qırmaq lazım deyil. Şərtlər başqa cür olsaydı, onların yerində siz də ola bilərdiniz. Mən də ola bilərdim. Bəxtimiz gətirib ki, daha yaxşı genlərə, daha yaxşı təhsilə ya da daha yaxşı ailəyə sahib olmuşuq. Amma təməldə hamımız eyni hüquqlu insanlarıq. İnsan olaraq heç birimiz fərqli deyilik və hamımız eyniyik.
Fuad Əsədov
